CHIE SEMUS

Un’istitutzione culturale noa est nàschida in Nùgoro: si narat “Interlimbas, Tzentru de documentatzione e de istùdios linguìsticos ”.

InterLimbas est un'organismu culturale sena finalidades lucrativas chi costìtuit unu puntu de referèntzia importante in Sardinna pro su mundu de sas culturas e de sas limbas natzionales.
In sos locales suos, tenet una BIBLIOTECA, organizat CURSOS DE LIMBA e ADDÒVIOS.

Naschet dae sa boluntade de sa sotziedade editoriale Papiros, chi dae medas annos est gherrende in favore de sa limba sarda, e de s’Assessoradu a sas polìticas educativas, formatzione e universidade de sa Comuna de Nùgoro, ghiadu dae sa professora Teresa Pintori. Su diretore de su Tzentru est Diegu Corraine.

Interlimbas est una manera de aunire a pare totu sas minorias chi, in Europa e in su mundu, cherent reconnota s’identidade issoro. ¿Comente? Organizende seminàrios, cunferèntzias, cursos e biazos de istudiu, amaniende prozetos de polìtica linguìstica, difundende sa connoschèntzia de custas temàticas cun totu sos mèdios iscritos, radiutelevisivos e telemàticos, costituende unu patrimoniu documentariu pro aumentare sa connoschèntzia de su sardu e de sas àteras limbas minoritàrias. Su nùcleu de s’atividade de Interlimbas est sa formatzione de una biblioteca ispetzializada, articulada in 5 setores: istùdios de linguìstica sarda e testos sardos; sa polìtica linguìstica in Europa; sa terminolozia; sa tradutzione; sa didàtica.

Ma non podimus fagher totu a sa sola. Pro traballare bene, tenimus bisonzu de s’azudu de totus. Pro custu pedimus, a totu sos chi tenent materiale interessante, de nos lu mandare, in orizinale o in còpia a custu indiritzu:
Interlimbas, via Aosta 28
08100 Nùgoro, C.P. 65A. .
Lis amus a esser reconnoschentes, e su nùmene issoro at a essire in su catàlogu de sa biblioteca cun s’iscrita “Donu de …”.
S’isperu, tando, est chi Interlimbas crescat e s’afortat semper de prus.